Wednesday, January 31, 2018

မာယာ များသောမိန်းခလေး

မာယာမိုး

လျှပ်စီးကြောင်းပျံ မိုးတိမ်ယံမှ
မာန်တကဲကဲ ဟန်နှင့်သည်းတော့
ပုလဲကလေးများ မြေမှာနှင်
အသည်းအေးသွား မေကညာခင်


          တစ်ခုသော နံနက်ခင်းတွင် ကျွန်ုပ်သည်ကဗျာဆရာမောင်နေနွယ်၏ အလှမာန်တက်နေသော ပျိုမြစ်နုနယ်သည့် မိန်းကလေးတစ်ယောက်အား ထစ်ချုန်းမိုးနှင့် နှိုင်းယှဉ်ထားသော ကဗျာတစ်ပုဒ်ကို ဖတ်ရင်းနှင့် စိတ်ထဲတွင် အဖြစ်အပျက်တစ်ခုကို တွေးမိကာ ပြုံးလိုက်မိပါသည်။
          ဟုတ်ပါသည်။ တကယ်တော့ ဒီအဖြစ်အပျက်က ကဗျာထဲကလို အဖြစ်အပျက်မျိုး ဟန်နှင့်လည်း သည်းသည်။ မာန်နှင့်လည်းကဲသည် ။ ဇာတ်လမ်းထဲက မိန်းကလေးရဲ့အမည်ကြားလိုက်ရတဲ့နေ့က ကျွန်ုပ်ရင်ထဲ တစ်မျိုးကြီးခံစားလိုက်ရသည်။

          သူ့နာမည်လေးက မိုးမိုးလှိုင်တဲ့။
          နာမည်လေးက လှသည်။ နာမည်လှသလို လူကလည်းချောပါသည်။ သို့သော်---

          `ဆရာမြတ်ထွဋ်ခါင်ရှိပါသလား ခင်ဗျား´
          ကျွန်ုပ်သည် ကြားဖူးနေကြအသံမဟုတ်သဖြင့် အိမ်ရှေ့မှန်တံခါးပေါက်မှ ခြံဝသို့ လှမ်းကြည့်လိုက်ရာ အသက်ငါးဆယ်ဝန်းကျင်ခန့် အသားဖြူဖြူ၊ ခန့်ခန့်၊ ဥပဓိရုပ်ကောင်းသော မျက်နှာစိမ်းဧည့်သည်အမျိုသား တစ်ယောက်အား တွေ့လိုက်ရ၏။
          ကျွန်ုပ်သည် ကျွန်ုပ်၏သမီးငယ် မေဇင်စိုးထွဋ်အား `သမီးလတ်ရေ -- အိမ်ရှေ့မှာဧည့်သည်ရောက် နေတယ် ခြံတံခါးဖွင့်ပေးလိုက်ပါကွယ်´
          သမီးလတ် ခြံတံခါးဖွင့်လိုက်သည်နှင့် ထိုသူသည် အိမ်ပေါ်သို့ လျှင်မြန်စွာတက်လာပြီး ဘာမပြော ညာမပြောနှင့် အိမ်ရှေ့ဆက်တီကုလားထိုင်တွင် ၀င်ထိုင်လိုက်ပြီး---
          `ဟူး--- မောလိုက်တာ ဆရာရယ်၊ ရှာလိုက်ရတာ´
          မဂ္ဂဇင်းထဲမှာ ဆရာ့အိမ်လိပ်စာက အမှတ်(၂၇၈)၊ မိဂသီလမ်း(၂၀)၊ (၁၂)ရပ်ကွက်၊ တောင်ဥက္ကလာလို့ ရေးထားတာတွေ့တယ်။ အဲဒီလိပ်စာအတိုင်းသွားရှာတော့ ဆရာက အမှတ်(၂၇၄)၊ မိဂသီလမ်း(၂၀)ကို ပြောင်းသွားတာ တစ်လရှိပြီလို့ပြောလိုက်တာနဲ့ ဒီဘက်ကိုထပ်လိုက်လာတာ၊ ဒီနေ့မှ နေကလည်းပူတော့ မောလိုက်တာ ဆရာရယ်။
          ကျွန်ုပ်သည် လူစိမ်းမိတ်ဆွေအာ ကြည့်၍ပြုံးမိ၏။ ပြီးတော့မှ ထိုလူစိမ်းအား
          `ကဲ---- အခုတွေ့ပြီဆိုတော့ စိတ်အေးရပြီပေါ့။ ကျွန်တော် ဘာကူညီရမလဲပြောပါအစ်ကိုကြီး´
          ` ကျွန်တော့်ရဲ့ ကံဇာတာလေး စစ်ချင်လို့ပါဆရာ´
          ကျွန်ုပ်သည်အခက်အခဲကြားမှ ရောက်ရှိလာသော ကိုလူစိမ်းအား ဗေဒင်စစ်ဆေးရန် ပြင်ဆင်လိုက် ပါသည်။ ထိုသူပေးသော ခုနှစ်သက္ကရာဇ်အရ---

အမည် - (၁၅-၂-၅၇)၊ သောကြာသား။
ဗေဒင်စစ်ဆေသည့်နေ့ရက် - (၁-၁၀-၀၇) တနင်္လာနေ့။
ဗေဒင်စစ်ဆေးချိန်  (၉)နာရီ (၁၀)မိနစ်။


                                                          

-      နေ့ အဋ္ဌလဂ် ကြာသပတေးတိုင်သည် ဗုဒ္ဓဟူးဂြိုလ်ခွင်တွင် ရပ်တည်နေသောကြောင့် လူလိမ်၊ အကျင့်ပျက်သူများနှင့်တွေ့နိုင်ကြောင်း။

-      နေ့တိုင်၏ခိုက်ဌာနတွင် တနင်္ဂနွေဂြိုလ် ရပ်တည်နေသာကြောင့် အိမ်ထောင်ရေးနှင့် ပတ်သက်နေပြီး၊ အချိန်တိုင်၏ ခိုက်ဌာနတွင် လူလိမ်အပျက်နှင့် ပတ်သက်နေသေကြောင့် အိမ်ထောင်ရေးနှင့် ပတ်သက်နေသောကြောင်း ပြနေကြောင်းသိရှိရပါသည်။

-      လစိတ်တွင်(၁၀)လပိုင်းသည် နိန္ဒာလောကဓံတွင် ရပ်တည်နေသောကြောင့် ဂုဏ်သိက္ခာကျဆင်းနိုင် ကြောင်းပြဌာန်းထားပါသည်။

-      မူလဇာတနာ(၂)ကြွင်း၏ ဥပဒေမှာလည်း တစ်ယူသန်တဇွတ်ထိုး ဘုရားတစ်ဖက် ဓားတစ်လက်ဇာတာ ဖြစ်ကြောင်း ပြဌာန်းထားပါသည်။

-      လောကဓံတွင် တနင်္လာဂြိုလ်သက်ရောက်ဖြစ်ပြီး၊ မူလမွေးနံသောကြာသားနှင့် သောက(အတွင်းရန်) မိနေပါသည်။ ၄င်းအတွင်းရန် သဘောကြောင့် အိမ်ထောင်အုပ်စုများ ပြိုကွဲခြင်းဖြစ်နိုင်ပါသည်။

ကျွန်ုပ်သည် ဦးသိန်းဟန်၏ ကံဇာတာကို အသေးစိတ်စစ်ဆေးမှုများပြုလုပ်ပြီးလျှင်---
`ကဲ--- ဦးသိန်းဟန်၊ ခင်ဗျားရဲ့ ကံဇာတာအရ ဒီနှစ်အတွင်းမှာ အတွင်းလူဖော်ပြန်မှုတွေ့ကြုံမယ်။ အိမထောင်ရေးနဲ့ပတ်သက်ပြီး သောကရောက်မယ်။´
ကျွန်ုပ်၏ တ်ုထိုးအိုးပေါက် ဟောလိုက်သောအကွက်ကြောင့် ဦးသိန်းဟန်တစ်ယောက် ရုတ်တရက် မျက်နှာလေးညှိုးသွားပြီး---
`ဟုတ်ပါတယ်ဆရာ၊ ကျွန်တော့်အမျိုးသမီး ကိုယ်ကျင့်တရားဖောက်ပြန်နေလို့် စိတ်ဆင်းရဲသောက ရောက်နေရပါတယ်။ ဆရာကူညီနိုင်ရင် ကူညီပါဦး --- ဆရာရယ်။

          ကျွန်ုပ်သည် ဦးသိန်းဟန်၏ တောင်းပန်တိုးလျိုးလိုက်သောစကားကြောင့် စိတ်ထဲတွင် အတော် စိတ်မကောင်းဖြစ်သွားပါသည်။ ပြီးတော့မှ---
`ကူညီတာကတော့ မခဲယဉ်းပါဘူး။ ရပါတယ်။ဒါပေမဲ့ ဦးသိန်းဟန်ရဲ့ အမျိုးသမီးကိုယ်တိုင်က၀န်ခံ လို့လား။ ဒါမှမဟုတ် ခင်ဗျားကိုယ်တိုင်ကပဲ သံသယ၀င်နေတာလားဆိုတာ  ကျွန်တော်အရင်သိထားမှ ဖြစ်မယ်။ ဒါမှ ဘယ်လို ကူညီရမလည်းဆိုတာ စဉ်းစားလို့ရမှာ´

          `ဒီလိုပါဆရာ ၊ ဆရာ့ကို ကျွန်တော်အသေးစိတ်ရှင်းပြပါ့မယ်´
သူနဲ့ ကျွန်တော် အိမ်ထောင်မကျခင်မှာ ကျွန်တော့မှာ အရင်အိမ်ထောင်ရှိခဲ့ဖူးပါတယ်။ ကလေးလည်းရှိ ပါတယ်။ သူက ဒုတိယအိမ်ထောင်ပေါ့။ အရင်အိမ်ထောင်နဲ့ ကွဲခဲ့တာလည်း သူ့ပယောဂမကင်းပါဘူး ဆရာရယ်။ သူ့ကိုသနားလို့ အကူအညီပေးမိတာနဲ့ နောက်ပိုင်း---
´
          `အင်း---ကျွန်တော်သဘောပေါက်ပြီ---ဦးသိန်းဟန် -- သြော် -- ဒါနဲ့ ကောင်မလေးနာမည်က´
`မိုးမိုးလှိုင် ပါ ဆရာ´
`သြော်´
          ကျွန်ုပ်သည် အမည်တို့၏ ပညတ်ကို အံ့သြမိ၍ `သြော်´ဟု တစ်လုံးထဲက ပြောနိုင်ခဲ့ပါသည်။
ကျွန်ုပ်သည် သင်တန်းတက်စဉ်ကာလမှ အမည်တို့၏ ပညတ်ချက်များကို ပြန်လည်၍ တွေးတောမိနေခဲ့ ပါသည်။

          ၄င်းမိုးမိုးလှိုင်၏ အမည်ပညတ်ကို သရုပ်ခွဲသော် --  `မိုး´ဆိုသောစကားလုံူးသည် လွှမ်းမိုးခြင်း၊ မိုးထားခြင်း၊ ခေါင်မိုးဟု အဓိပ္ပာယ်အကြမ်းအားဖြင့် ယူဆပြီး `မိုး´၏ သဘာဝကို လေ့လာကြည့်ရာ တိမ်မည်းသော်လည်း မိုးမရွာခြင်း၊ တိမ်ဖြူသော်လည်း ရွာသွန်းမှုအားကြီးခြင်း၊ မိုးအုံ့သော်လည်း မရွာခြင်း၊ နေပူသော်လည်း မိုးသန်းထန်စွာ ရွာသွန်းခြင်းအစရှိသော ခန့်မှန်းရခက်သည့် ညဉ်စရိုက်များရှိကြောင်း၊  မူယာမာယာများတတ်သည့် သဘောရှိကြောင်း။ အမည်၏ အဖျားလုံးမှာ `လှိုင်´၏ အဓိပ္ပယ်မှာပေါများခြင်း `မိုးမိုးလှိုင်´ဆိုသည်မှာ မိုးသည်းထန်စွာ ရွာသွန်းခြင်း (သို့) မာယာများခြင်းဟု မျိုးကွဲဥပဒေများ ပေါ်ထွက်လာပါသည်။

          `ဆရာ -- ဘာတွေ စဉ်းစားနေတာလဲ´

          `သြော် --- ဦးသိန်းဟန်ရဲ့ အမျိုးသမီးအမည်ကို စဉ်းစားနေတာပါ။ ဒါနဲ့ဆက်ပါဦး။ ဇာတ်လမ်းက ဘယ်လိုဖြစ်သွားတာလဲ´
          `ဒီလိုဆရာရဲ့--- ကျွန်တော်က တာဝန်နဲ့ နေပြည်တော်-ပျဉ်းမနားကိုပြောင်းရတယ်။ ဟိုမှာ ကျွန်တော်နေတာ(၈)လလောက်ကြာသွားတယ်။ ဒီကိုပြန်ပြောင်းလာတော့ သူကကောင်လေး တစ်ယောက်နဲ့တွဲနေတယ်လို့သတင်းရတာနဲ့ ကျွန်တော်လိုက်စုံစမ်းတော့ ဟုတ်နေတာတွေ့ရတယ်။
          `နေဦးဗျ ကျွန်တော်မရှင်းလို့ မေးပါရစေ၊ ခင်ဗျားတို့ကအတူနေတာ မဟုတ်ဘူးလား´
          `အတူနေတာမဟုတ်ဘူး ဆရာရဲ့၊ တရားရုံးမှာလက်ထပ်ပြီး အတူနေဖို့ တိုက်ခန်းတစ်ခန်း ၀ယ်ထားလိုက်တယ်။ ကျွန်တော်က နယ်က ပြန်ပြောင်းလာမှ အတူနေဖို့ဆုံးဖြတ်ထားတာ။ ကျွန်တော် နယ်က ပြန်ရောက်တော့ သူက ဒီမှာပုံစံတစ်မျိုးဖြစ်နေပြီ။
          `သြော်´
          ကျွန်ုပ်မှာ ဒုတိယအကြိမ် `သြော်´လိုက်မိပြန်သည်။
`ကဲ-- ဦးသိန်းဟန်၊ ကျွန်တော်က ဘာလုပ်ပေးရမှာလဲ၊ ဓာတ်ဆင်ဓာတ်ရိုက်ပညာပိုင်းနဲ့ပြန်ခေါ်ပေးရမှာ လား၊ ဒါမှမဟုတ် ခင်ဗျားကိုယ်တိုင်က မယားခိုးမှုနဲ့ တရားစွဲမှာလား´
ကျွန်ုပ်၏ရုတ်တရက်ပြောလိုက်သောစကားကြောင့် ဦးသိန်းဟန်တစယောက် ခေတ္တမျှတွေဝေသွားပါသည်။
 ပြီးတော့မှ--
          `မယားခိုးမှုနဲ့လည်း တရားမစွဲချင်ဘူး၊ ဓာတ်ဆင် ဓာတ်ရိုက်လုပ်ပြီး ပြန်လာအောင်လုပ်တာမျိုးလည်း မလုပ်ချင်ဘူး၊ သူ့ဘာသာသူပြန်လာတာမျိုးပဲ လိုချင်တယ်။ ဟိုလူထက် ကျွန်တော်ကိုပိုချစ်တယ်ဆိုရင် ပြန်လာမှာပဲ။ အဲလိုမျိုးဆိုတော့ ပိုမကောင်းဘူးလား။ နောက်ပြီး ဆရာဗေဒင်မှာကော သူကျွန်တော့ဆီကို ပြန်လာကိန်းရှိသလား။
          `လွယ်တော့မလွယ်ဘူး ထင်တယ်-- ဦးသိန်းဟန်၊ ခင်ဗျားကံဇာတာမှာ ဒီနှစ်ထဲအတွင်း အုပ်စုပြိုကွဲမယ် လို့ ပြဌာန်းထားတော့ သူ့သဘောနဲ့သူတော့ ပြန်လာမှာမဟုတ်ဘူး´
          `ဒါဆိုလည်း ထားလိုက်ပါတော့ ဆရာရယ်၊ ကျွန်တော့်ဘ၀နဲ့ ကျွန်တော်ဘဲရှိပါစေတော့´
          ဦးသိန်းဟန်တစ်ယောက် လေးတွဲသော ခြေလှမ်းများဖြင့် ကျွန်ုပ်၏နေအိမ်မှ ပြန်လည်ထွက်ခွာသွားချိန် တွင် ရုတ်တရက်နေပူနေရာမှ ကောင်းကင်တစ်ခုလုံးမည်းကာ မိုးများရွာချလိုက်ပါတော့သည်။

          ကျွန်ုပ်သည်မိုးရေထဲတွင် ထွက်ခွာသွားသော ဦးသိန်းဟန်၏ နောက်ကျောသို့ ကြည့်ရင်း---
          `သြော်-- ဦးသိန်းဟန် -- ဦးသိန်းဟန်၊ ထီးယူသွားပါဆိုလည်း ယူမသွားဘူး၊ တစ်ကိုယ်လုံး စိုရွှဲကုန်ပြီ။ မိုးကလည်း ခန့်မှန်းရခက်လိုက်တာ။ ခုနကပဲ နေပူတယ်၊ ခုတော့ ရွာလိုက်တာ အသည်းအသန်ပဲ။ တော်တော် မူရာ မာယာများတဲ့မိုး `မိုး´ဟု တွေးတောမိရင်း--
-
          `မူရာများသော မာယာမိုး´ဇာတ်လမ်းအား ဤနေရာတွင်ပဲ တစ်ခန်းရပ်လိုက်ပါတော့သည်။



         
                  

          

No comments:

Post a Comment