Thursday, February 22, 2018

ကျွန်ုပ်ကိုယ်တွေ့ အယူတော်မင်္ဂလာနှင့် သေမင်းတမာန်တံခါး

ကျွန်ုပ်ကိုယ်တွေ့အယူတော်မင်္ဂလာပညာနှင့်
သေမင်းတမန်တံခါးမပွင့်သွားခြင်းအကြောင်း
===========================

          တစ်ခုသော နေ့လည်ခင်းတွင် ကျွန်ုပ်၏ ဗေဒင်ဟောခန်းရှိရာ ကျိုက္ကဆံဘုရား အနောက်ဖက်မုဒ်သို့ အသက် (၅၀) ၀န်းကျင်ခန့်လွန်စွာ ဥပဓိရုပ်ကောင်းလှသော အမျိုးသမီး တစ်ဦးသည် အမျိုးသားတစ်ဦး၏ ဇာတာတစ်ခုကို ကိုင်ကာ ၀င်ရောက်လာပါသည်။
          ကျွန်ုပ်သည်လည်း လုပ်ရိုးလုပ်စဉ်အရ ၄င်းအမျိုးသမီးပေးလာသောဇာတာကို ယူလိုက် ချိန်တွင် ---
          ''ဆရာ --- ခဏ ''
          '' ဟင်  ----- ''
          ''ကျွန်ုပ်မှာ ထိုအမျိုးသမီး၏ ရုတ်တရက်ပြောလိုက်သော စကားကြောင့် အနည်းငယ် တွန့်သွားကာ ဗေဒင်တွက်ချက်မှုကို ခဏရပ်လိုက်ပါသည်။
          ''ဆရာကို ကျွန်မဗေဒင်မတွက်ခင် တစ်ခုလောက်ကြိုတင်ပြီး ပြောထားပါရစေ''
          ''ဟုတ်ကဲ့ပါ ---- ပြောပါ ။အစ်မကြီး ပြောပါ။ အစ်မကြီးထက်က အခုလို ပွင့်လွင်းမှုရှိတော့ ကျွန်တော်တို့ ပညာပိုင်းမှာ ပိုပြီးတိကျမှုရှိတာပေါ့''
          ''ကျွန်မ အခုတွက်မဲ့ ဇာတာက ကျွန်မရဲ့ မောင်လေးဇာတာပါ။ သူကအခု ကျန်းမာရေး မကောင်းလို့ အထူးကုဆေးခန်းမှာ တင်ထားပါတယ်။ အဲဒါ တစ်ချက်လောက် သူ့ကျန်းမာရေး အခြေအနေကို ဦးစားပေးတွက်ပါလို့''
          ကျွန်ုပ်မှ ''ဟုတ်ကဲ့ ကျွန်တော်အတတ်နိုင်ဆုံး ပညာကပြတဲ့ကိန်းတွေကို တိကျအောင် စစ်ဆေးပေးပါ့မယ်''
          ထိုအမျိုးသမီးပေးလာသော ဇာတာအရ
အမည်                              -        ကိုသိန်းဇော်
မွေးသက္ကရာဇ်                     -        (၁၃၃၂)ခု ၊ နယုန်လ ၊ သောကြာသား။
ဗေဒင်စစ်ဆေးသောနေ့ရက်   -        ၂-၈-၀၇ ၊ ကြာသပတေးနေ့ နေ့လည် (၁း၀၀)။
                             ၂                           ၁
                             ၆                           ၅
                             ၃                           ၂   (အဖြူရောင်နိမိတ်)
                             -၅-                        -၄-
                             ၁                           ၀
                             ၄                           ၃
                             ၀                           ၆ (ကာယကံရှင်)
                         (နေ့)                         (အခါ)

          ဗေဒင်လာတွက်သည် အမျိုးသမီးဝတ်ဆင်လာသော အရောင်မှာ အဖြူရောင်ဖြစ်နေသဖြင့် နေ့တိုင်တွင် (န၀င်း)ဌာနတွင် ရပ်တည်နေပြီး အချိန်တိုင် ဆပွတ် (စုတ်) ဌာနတွင် ရပ်တည်နေပါ သည်။ နေ့အဌလဂ်တွင်လည်း ဗုဒ္ဓဟူးဂြိုလ်သည် တနင်္လာအိမ်ရှင် သခင်ဂြိုလ်တွင် ၀င်ရောက်ရပ်တည်နေမှုကြောင့် အမြင်အားဖြင့် အကောင်းဟု ယူဆရပါမည်။
          သို့သော် ကာယကံရှင်၏ မွေးနံမှာ (တြိရန်း) ဌာန အဆိုးတွင် ရပ်တည်နေမှုကြောင့် အကောင်းနှင့်အဆိုးမှာ ဒွန်တွဲနေကြောင်း သိရှိရပါမည်။
          ဇာတာခွင်တွင် ကာယကံရှင် ကိုသိန်းဇော်၏ အသက်အပိုင်းအခြားမှာ (၃၈)နှစ် နိန္နာ လောကဓံတွင် ကျရောက်နေမှုကြောင့်နှင့် သူ၏မွေးနံသောကြာနှင့် နိန္နာ စနေဂြိုလ်တို့မှာ (သုတ) (၆x၀) အပြင်ရန်မိထားသောကြောင့် အသက်အပိုင်းအခြားအရ (အဆိုးဟု သတ်မှတ်ရပါမည်။)
          နိန္နာလောကဓံတွင် ရောက်ရှိလာသော လူသားတိုင်း သတိပြုရမည့်အချက်မှာ တစ်ချက်မှားလိုက်သည်နှင့် အသက်ဆုံးရှုံးနိုင်ခြင်း၊ စီးပွားဥစ္စာဓနာများ တစ်ခုမကျန်ကုန်ဆုံး နိုင်ခြင်း၊ အိမ်ထာင်ပြိုကွဲခြင်း အစရှိသော ဥပဒ်ကြီးများ ၀င်ရောက်နိုင်သောကြောင့် ကျွန်ုပ်မှာ ကာယကံရှင် ကိုသိန်းဇော်၏ ကံကြမ္မာကို ဆုံးဖြတ်ရန် အခက်အခဲများစွာရှိနေပါသည်။
          ထို့ကြောင့် ကျွန်ုပ်သည် ၄င်းကိုယ်စားလှယ်အမျိုးသမီးအား ဇာတာရှင် ကိုသိန်းဇော်၏ ကံကြမ္မာမှာ သေရေးရှင်ရေးဆုံးဖြတ်ရမည်ဖြစ်သဖြင့် အသေးစိတ် ထပ်မံစစ်ဆေးရန် လိုအပ် ကြောင်း ပြောပြ၍ နောက်တစ်ရက်ထပ်၍ ချိန်းလိုက်ပါသည်။
          ထိုအမျိုးသမီးပြန်သွားချိန်တွင် ကျွနု်သည် ဟိုးလွန်ခဲ့သော (၁၅)နှစ်တာကာလမှ သင်တန်း တက်စဉ် ကျွန်ုပ်၏ဆရာသခင်ကျေးဇူးရှင်တို့၏ စကားကို ပြန်လည်ကြားယောင်နေမိပါသည်။ ဆရာ၏ ပြောပြချက်မှာ ''တပည့် ---- ၊ မင်းက ဥာဏ်ကောင်းတော့ မင်းကို ဆရာ၊ ဆရာစားတစ်ကွက် ပြောမယ်။ အကယ်၍ မင်းဗေဒင်ပညာမှာ ဆုံးဖြတ်ရခက်ခဲတဲ့ ကိစ္စတွေရှိလာ ခဲ့ရင် အယူတော်မင်္ဂလာပညာရပ်နဲ့ တွဲသုံး၊ ဒါမှ လိုချင်တဲ့ အဖြေကို အတိအကျရမယ်။
          ကျွန်ုပ်သည် ဆရာသခင်တို့၏ မှာကြားချက်အတိုင်း ကိုသိန်းဇော်၏ ကျန်းမာရေး ပြဿနာကို အယူတော်မင်္ဂလာပညာနှင့် ဆုံးဖြတ်ရန်အတွက် ဟောခန်းရှိရာ နေအိမ်မှ အရပ် မျက်နှာရွေးပြီး လမ်းမသို့ ထွက်လာခဲ့ပါသည်။ ကျွန်ုပ်သည် နေအိမ်ရှိရာ (၁၉)လမ်းမှ ဘရဏီလမ်း ဘက်သို့ ကွေ့ပြီး ဟိုဘက်ကာလမ်းသို့ ကူးရန်အတွက် ကားရှင်းမရှင်း လမ်းမသို့ ကြည့်နေချိန် တွင် ကားလမ်း၏ ညာဘက်အခြမ်းမှ ပိန်ပိန်အရပ်မြင့်မြင့်နှင် လူတစ်ယောက်သည် ဘယ်ဘက် ကားလမ်းရှိ လူတစ်စုအား ----
          ''ဟို --- ကိုလင်းလင်း၊ ကျွန်တော် အဆင်ပြေသွားပြီဗျို့ ၊ ထူးထူးခြားခြားပဲ တစ်နေရာ တစ်ယောက် ဖြစ်တောင့်ဖြစ်ခဲပဲဟေ့ --- ''
          ထိုသူအော်လိုက်သော အသံမှာ ပတ်ဝန်းကျင်အတွက် ဘာမှ မထူးခြားပေမယ့် ကျွန်တော့် အတွက်တော့ ထူးခြားတဲ့ နိမိတ်တစ်ခုပါ။
          ကျွန်ုပ်သိချင်တာက ကိုသိန်းဇော်၏ ကျန်းမာရေးအတွက်ပါ။ နိမိတ်ကောက်ပညာအတွင် အဓိပတိ တပ်ထားသော အကြောင်းနှင့် ဆက်စပ်မှု (အကြား၊ အမြင်) နှစ်ခုလုံးပေါင်းစပ်ကာ အကောင်းနှင့်အဆိုးကို ဆုံးဖြတ်ရပါသည်။
          အဖြစ်အပျက်တို့သည် ကိုသိန်းဇော်၏ ကျန်းမာရေး ထူးထူးခြားခြားပြန်လည် ကောင်းမွန်မည်။ လူတစ်ရာတွင် တစ်ယောက်ပြန်မကောင်းနိုင်သော ကိစ္စများပြန်ကောင်းမည်ဟု အဖြေထွက်နေပါသည်။ ပို၍ သေချာအောင် လက်မှ နာရီကိုကြည့်လိုက်ရာ အချိန်တိုင်မှာ သောရီ (စနေ) ချိန်ဖြစ်ကြောင်း သိလိုက်ရပါသည်။

                   ၄
                   ၁
                   ၅
                   ၀
                   ၃
                   ၆ (လှုပ်ရှားမှု) ခိုက်
                   ၂

          အချိန်တိုင်တွင် သောကြာဂြိုလ်အဆိုးဖြစ်နေ၍ ကာယကံရှင် ကိုသိန်းဇော်၏ မွေးနံမှာ ဆိုးနေကြောင်း သိလိုက်ရသည်။ သို့သော်လည်း အသံနိမိတ်မှာ အဆိုးများလွတ်မည်ဖြစ်ကြောင်း ပြသနေပါသည်။
          နောက်တစ်နေ့မနက်တွင် ကျွန်ုပ်ချိန်းဆိုထားသည့်အတိုင်း ကိုသိန်းဇော် အစ်မဖြစ်သူ သည် ကျွန်ုပ်၏ဟောခန်းရှိရာ နေအိမ်သို့ ရောက်ရှိလာပါသည်။
          ကျွန်ုပ်မှ မဆိုင်းမတွပင် ---
          ''အစ်မကြီး ရောက်လာတာ အတော်ပဲ ၊ ကိုသိန်းဇော်အတွက် ၀မ်းသာစရာ သတင်းတစ်ခု ပြောရဦးမယ် အစ်မကြီးမောင် တစ်လအတွင်း ကျန်းမာရေးပြန်ကောင်းလိမ့်မယ် ၊ ဘာမှမပူ နဲ့တော့''
          ကျွန်ုပ်၏ ခရီးရောက်မဆိုက် ပြောလိုက်သော စကားကြောင့် ၄င်းအမျိုးသမီးသည် မျက်ရည်များဝဲလာကာ ----
          ''ဆရာပြောသလိုဆို ကျွန်မမောင်လေး မသေတော့ဘူးပေါ''
          ''အမှန်ပါပဲ အစ်မကြီး ကျွန်တော်အသေအချာ တကွက်ချက်ပြီးမှ ပြောတာပါ''
          ကျွန်ုပ်၏ ၀မ်းသာစရာစကားကြောင့် ကိုသိန်းဇော်၏ အစ်မဖြစ်သူသည် ကျွန်ုပ်အား ကျေးဇူးတင်ကြောင်း အခါခါပြောဆို၍ ဘုရားကို ဦးသုံးကြိမ်ချကာ ကျွန်ုပ်၏ ဟောခန်းတွင်းမှ ပြန်လည်ထွက်ခွာသွားပါသည်။
          တစ်လခန့်ကြာသော် ----
          ကျွန်ုပ်သည် ၄င်းအဖြစ်အပျက်တို့အား မေ့လုလုဖြစ်ကာ ကျွန်ုပ်၏ စာမူကိစ္စများ၊ ဗေဒင် လုပ်ငန်းကိစ္စတို့နှင့် အလုပ်ရှုပ်နေစဉ် ----
          ''ဆရာမြတ်ထွဋ်ခေါင် ရှိပါသလားရှင်''
          ချိုလွင်သော အသံတစ်ခုကြောင့် ကျွန်ုပ်သည် အိမ်ရှေ့သို့ လှမ်းကြည့်လိုက်ရာ ----
          ''ဟာ --- အစ်မကြီးပါလား ၊ ဧည့်သည်လည်း ပါလာတာကိုး။ လာကြ ---- လာကြ၊ အိမ်ထဲဝင်ကြ ဘယ်လိုလဲ ---- အစ်မကြီး မောင်ကျန်းမာရေး အခြေအနေ''
          ထိုအမျိုးသမီးကြီးသည် ကျွန်ုပ်၏လောကွက်လုပ်၍ မေးလိုက်သော စကားကြောင့် ကျွန်ုပ်အား ပြုံး၍ကြည့်ကာ ---
          ''ဒီမှာလေ ဆရာရဲ၊ ကျွန်မ မောင်ဆိုတာ''
          ဟု သူနှင့်အဖော်ပါလာသော အမျိုးသားကို လက်ညှိုးထိုး၍ ဖြစ်ပါသည်။
          ''ဒီဘက်ဘေးက သူ့အမျိုးသမီးပေါ့ ၊ ကျွန်မ မောင်လေးက ဆရာ့ကို ကန်တော့ချင်တယ် ဆိုတာနဲ့ ခေါ်လာရတာ --- ''
          ''သြော် ----- အစ်မကြီးရယ် ဒီလောက်ကြီးလည်း မဟုတ်ပါဘူး။ ကျွန်တော်က လူတိုင်းကို ကူညီနေတာ ကူညီထိုက်လို့ ကူညီခဲ့တာပဲ ရေစက်ရှိကြလို့ မှတ်လိုက်ပေါ့ --- ''
          ကျွန်ုပ်သည် ကိုသိန်းဇော်တို့ လှူဖွယ်ပစ္စည်းနှင့်ငွေကို လက်ခံပြီး ဘေးဥပဒ်အန္တရာယ် အပေါင်းလွတ်ကင်းပါစေဟု ဆုများပေးလိုက်ရာ ၄င်းတို့မောင်နှမတစ်စုသည် ဘုရားရှင်နှင့် ဆရာကို ဦးထိပ်ထား၍ ကန်တော့ပြီး ကျွန်ုပ်၏နေအိမ်မှာ ထွက်ခွါသွားသည်ကို ငေးကြည့်နေ မိသည်။
          အယူတော်မင်္ဂလာနှင့် သေမင်းတမန်တံခါး မပွင့်သွားခြင်း အကြောင်း၏ နောက်ကွယ်တွင် တစ်စုံတစ်ခုရှိနေပါသေးသည်။
          အကြောင်ကတော့ န၀င်းစီးပွဲ ဓာတ်ခန်းဖွင့်ပညာဖြစ်ပါသည်။ ကျွန်ုပ်သည် ၄င်း၏ ကျန်းမာရေး ညံ့သူအား န၀င်းပညာအသုံးချခဲ့ပါသည်။
          န၀င်းပညာတွင် ကျန်းမာရေး၊ လူမှုရေး၊ အိမ်ထောင်ရေး၊ စီးပွားရေး၊ ရာထူးဟူ၍ အမျိုးမျိုး ရှိရာ ကိုသိန်းဇော်၏ ကျန်းမာရေးအတွက် -
-      ကြွင်းန၀င်း
-      ဒွေးန၀င်း
-      ဆောင်းပန်း နင်းကြမ်းများသုံးကာ ကျန်းမာရေး (၂)ကွင်းစီးအတွင်း ဓာတ်တည်ငြိမ်မှု များအတွက် (၅)ကွင်းစီ သုံးကာ ဓာတ်ယတြာများ အသုံးချခဲ့ပါသည်။ စာဖတ်သူများ သည် ၄င်းအယူတော်မင်္ဂလာပညာနှင့် ဓာတ်ယတြာများအကြောင်းကို အသေးစိတ် သိလိုပါက လူကိုယ်တိုင်လာရောက်၍ ကျွန်ုပ်၏ဟောခန်းတွင် ဆွေးဆွေးနိုင်ကြောင်း -- စေတနာထား၍ ပြောလိုက်ရပါသည်။






No comments:

Post a Comment