Monday, February 12, 2018

ပစ္စည်းပျောက်ဟောကိန်းများ

ကျွန်ုပ်ကိုယ်တွေ့ အင်္ဂ၀ိဇ္ဇာ ပစ္စည်းပျောက်ဟောကိန်း

        (၃၀.၅.၀၆) ၊ အင်္ဂါနေ့ ၊ ည (၈း၃၀) နာရီ။
          အပြင်မှာ မိုးတွေက ပြင်းထန်စွာ သည်းကြီးမည်းကြီးနှင့် ရွာသည်။ မိုးရွာသံများနှင့်အတူ လျှပ်စီး တစ်ချက်လက်ကာ မိုးကြိုးပစ်လိုက်သည့်အသံသည် ကျွန်ုပ်၏ နားတွင်းသို့ အတားအဆီးမရှိ ၀င်ရောက် လာသည်။
          ကျွန်ုပ်သည် (၂၀၀၂)ခုနှစ် ဗေဒင်သင်တန်းတွင် ကျွန်ုပ်ကိုယ်တိုင် သင်တန်းသားများနှင့် အမေး အဖြေပြုလုပ်ထားသော မှတ်တမ်းများကို ပြန်လည်စစ်ဆေးနေချိန်ဖြစ်သည်။ နောက်ထက်လျှပ်စီးတစ် ချက်သည် ကျွန်ုပ်၏ အိမ်ရှေ့တစ်ခါးဝမှ အိမ်အတွင်းထဲသို့ ၀င်းခနဲလာရာ ကျွန်ုပ်သည် လုပ်လက်စ အလုပ်ကိစ္စများကို ခဏရပ်ကာ တိုင်ကပ်နာရီကို တစ်ချက်ကြည့်လိုက်မိသည်။ (ည ၈း၄၅)နာရီ။
          ထိုအချိန်တွင် လောကတအားတိုက်လိုက်သဖြင့် အိမ်ရှေ့တံခါးမှာ ၀ုန်းခနဲ့ဖြစ်သွား၍ ကျွန်ုပ်၏ မျက်လုံးအစုံတို့မှာ နာရီကိုကြည့်နေရာမှ အိမ်ရှေ့သို့ ရုတ်တရက် လှမ်းကြည့်လိုက်မိရာ
          ''ဟာ ---- ဘာကြီးလဲဟ''
          အိမ်ရှေ့တွင် လူတစ်ယောက်သည် တစ်ကိုယ်လုံး မိုးများရွှဲရွှဲနစ်အောင် စိုနေသည်ကို တွေ့လိုက် ရသည်။ ကျွန်ုပ်သည် စာမူများကို ကပျာကယာသိမ်းလိုက်ပြီး -
          ''ဟေ့ --- ဘယ်သူလဲကွ''
          ထိုလူမှ ''ကျွန်တော်မှ ဆရာ''
          ''ကျွန်တော်ဆိုတာ ဘယ်သူလဲကွ ၊ ညကြီးမိုးချုပ်''
          ''အောင်ဝင်းပါ ဆရာ''
          ''ဟာ --- ကိုအောင်ဝင်း --- ညကြီးအချိန်မတော် မိုးတွေ ဒီလောက်ရွာနေတာ ဘာကိစ္စရှိလို့လဲ''
          ''ကျွန်တော် ---- ဟို''
          ''ဟေ့လူ --- ခင်ဗျား  ဘာတွေဖြစ်နေတာလဲ ၊ အိမ်ပေါ်တက်ခဲ့လေဗျာ''
          ''မတက်ချင်တော့ပါဘူး ဆရာရယ် ။ ဆရာ့ကို အကူအညီ တစ်ခုတောင်းချင်လို့ပါ။ ညနေက ကျွန်တော့်စက်ဘီးပျောက်သွားလို့''
          ''ဟေ--- ဟုတ်ရဲ့လား ၊ ကိုအောင်ဝင်းရာ''
          ကျွန်ုပ်သည် ကိုအောင်ဝင်း၏ စက်ဘီးကို ခဏခဏမြင်ဖူးနေသောကြောင့် ထိုသို့ပြန်မေးလိုက် ခြင်းဖြစ်ပါသည်။ သူ့စက်ဘီးသည် ဂျပန်ပစ္စည်းများဖြင့် စိတ်ကြိုက်ဆင်ထားရာ ကာလတန်ဖိုးအားဖြင့် နှစ်သိန်းလောက်တန်သည်။
          ''ပြောပါဦး ကိုအောင်ဝင်း ---- ဘယ်လိုကနေ ဘယ်လိုဖြစ်တာတုန်း''
          ''ကျွန်တော့်အပြစ်ပါ ဆရာရယ် ---- ညနေတုန်းက ဆရာနဲ့ ကိုသက်ဝေ ထိုင်စကားပြောနေတုန်း ကျွန်တော်လည်း ကွမ်းယာသွားဝယ်နေတာ ကွမ်းဆိုင်က ပြန်ထွက်တော့ စက်ဘီးကိုမေ့ပြီး အိမ်ကို ဒီ အတိုင်း ခြေကျင်နဲ့ပဲ ပြန်သွားမိတယ်။ အိမ်ရောက်တော့လည်း သတိမထားမိဘူး။ နောက် ကိုသက်ဝေ ကလည်း ဆရာ့ဆီကအပြန် ကျွန်တော့်အိမ်ကို ၀င်လာပြီး နှစ်ယောက်သား ထိုင်စကားပြောလိုက်တာ ည (၇း၀၀)နာရီ ကျော်သွားတယ်။ ည (၈း၀၀)နာရီကျော်လောက် ရှိမယ်ထင်တယ်။ ကျွန်တော့်တူလေး အိမ်ကို လာတော့ ဦးလေး ---- ကျွန်တော့်ကို စက်ဘီး ခဏငှားပါ။ ကျွန်တော် အပြင်သွားစရာကိစ္စရှိလို့ ဆိုတော့မှ ကျွန်တော်ဈေးထဲမှာ စက်ဘီးမေ့ကျန်ခဲ့မှန်း သိတော့တယ်။
          ကျွန်ုပ်လည်း ကိုအောင်ဝင်း၏ အဖြစ်အပျက်ကို နားထောင်ရင်း လက်မှ နာရီကို လှည့်ကြည့်လိုက် သည်။
                   အင်္ဂါနေ့ ည (၈း၅၅)နာရီ
                  
          ဘယ်နှစ်နာရီထိုးပြီလဲ ဆရာထွဋ် ---- ကျွန်တော့်အိမ်မှာ ကြည့်လိုက်တော့ တနင်္ဂနွေချိန်ဖြစ်နေ တယ်။ တနင်္ဂနွေချိန်မှာ အင်္ဂါနံစက်ဘီးက ပျက်/ထွက် နေရာရောက်တော့ မိန်းမရေ ---- တို့စက်ဘီး တော့ပျောက်ပြီလို့ ကျွန်တော့်မိန်းမကို ပြောလိုက်တယ်။
          ၅
          ၂
          ၆
          ၁
          ၄
          ၀
          ၃ (စက်ဘီး) ပျက်/ထွက်
          အဲဒါနဲ့ ကျွန်တော့်ဇနီးက ကိုအောင်ဝင်း ---- ရှင့်သဘောနဲ့ ရှင်ဆုံးဖြတ်မနေနဲ့၊ ရှင့်ဆရာကို သွားမေးလိုက်ဦးဆိုလို့ ကျွန်တော်လည်း ဆရာ့ဆီကို ညတွင်းချင်းထွက်လာခဲ့တာ။
          ကျွန်ုပ်သည် ကိုအောင်ဝင်းပြောသမျှ စကားများကို အစအဆုံး နားထောင်ပြီး ပြုံးလိုက်မိပါသည်။
          ''ကဲ ကိုအောင်ဝင်း ၊  ကျွန်တော် ခင်ဗျားနဲ့ လိုက်ခဲ့မယ်။ ခင်ဗျား စက်ဘီးမပျောက်ဘူး။ ဈေးထဲ မှာပဲ ရှိတယ်''
          '' ဟာ --- ဆရာကလည်း စက်ဘီးက ပျက်/ထွက်နေရာကို ရောက်နေတာ ဈေးထဲမှာ ရှိပါဦး မလား''
          ''ကဲပါ ---- ကိုအောင်ဝင်းရယ် ၊ ကျွန်တော် ပြောတာကိုသာ လုပ်ပါ။ ကျွန်တော်တို့ နှစ်ယောက် ဈေးထဲကို သွားကြမယ်။ ဟိုကျရင် ခင်ဗျားလိုချင်တဲ့အဖြေကို ရမှာပဲ''
          ကျွန်ုပ်သည် မိုးကာနှင့် ဦးထုပ်များကို ဆောင်းလိုက်ပြီး စက်ဘီးကို ခြံထဲမှ တွန်းထွက်လာခဲ့သည်။ ကျွန်ုပ်နောက်မှ ကိုအောင်ဝင်းလည်း ကသောကမျောနှင့် လိုက်လာပြီး -
          ''ဆရာ''
          ''ဟေ -- ဘာလဲကွ''
          ''အချိန်ကိုလည်း ကြည့်လိုက်ဦးနော် ။ (၉း၀၀)နာရီထိုးဖို့ (၅)မိနစ်ပဲ လိုတော့တယ်။ အပြင်မှာ မှောင်နေပြီ။ မိုးတွေကလည်း တအားသည်းနေတယ်''
          ''ဟာ ---- ကိုအောင်ဝင်းကလည်း ၊ ဘာလဲ ခင်ဗျားက စက်ဘီးကို ပြန်မလိုချင်တော့ဘူးလား''
          ''ဟဲ --- ဟဲ လိုချင်တာပေါ့ ဆရာရယ်၊ ဒါပေမဲ့ ဆရာ့ကို အားနာ ----''
          ''ဟေ့လူ --- တော် --- တော် ခင်ဗျားနဲ့ ကျွန်တော့်ကြားမှာ အားနာတာတွေဘာတွေ လာလုပ် မနေနဲ့ သွားကြမယ်''
          နှစ်ယောက်သား စက်ဘီးတစ်စီးနှင့် မိုးထဲလေထဲတွင် ဈေးဘက်သို့ ထွက်လာခဲ့ကြသည်။ ဈေးဆိုပေမယ့်လည်း ကျွန်ုပ်တို့သောနေသောအိမ်နှင့် သိပ်တော့မဝေးပါ။ ကျွန်ုပ်နေထိုင်သော မိဂသီလမ်း (၂၀)မှ တည့်တည့်နင်းသွားပြီး ဘရဏီလမ်းသို့ရောက်လျှင် ဈေးသို့ရောက်ပြီဖြစ်သည်။
          တောင်ဥက္ကလာပမြို့နယ်တွင် ဟေမ၀န်ဈေးသည် ယခင်က (၁၀)ရပ်ကွက်ဈေးဟူ၍ ခေါ်ကြပြီး အလွန်စည်ကားသော ဈေးတစ်ခုဖြစ်ပါသည်။
          မိုးကပို၍ သည်းလာသည်။ ဘရဏီလမ်းထိပ်တံတားသို့ အရောက်တွင် --
          ''ဆရာထွဋ် --- တနင်္ဂနွေတိုင်မှာ စက်ဘီး ပျက်/ထွက် နေရာကို ရောက်နေတာ ဆရာက ဘာဖြစ်လို့ အဲဒီလို မူလနေရာမှာပဲ ရှိတယ်လို့ တပ်အပ်ပြောရတာလဲ''
          ''သြော် ---- ကိုအောင်ဝင်းက ဒီကိစ္စကို အရမ်းသိချင်နေတာကိုး။ ဒီမှာ ကျွန်တော်ပြောပြမယ်။ နေ့တိုင်က ဘာတိုင်လဲ''
          ''အင်္ဂါနေ့ဆိုတော့ ယာယီတိုင်ပါဆရာ''
          ''ယာယီတိုင်က ရွေ့လျားမှုကို ပြနေတယ်။ ခင်ဗျားစက်ဘီးက အိမ်မှာမရှိဘူး။ အိမ်ကနေ ထွက်လာပြီးမှ ဈေးရောက်တော့ ယာယီသဘောနဲ့ စက်ဘီးကိုရပ်တယ်။ အခါတိုင်က တနင်္ဂနွေတိုင်ဆို တော့ ရွေ့လျားမှုမရှိတော့ဘူး။ ဈေးမှာပဲ ဂိတ်ဆုံးသွားတယ်။ ဆက်ပြီး မရွေ့ မပြောင်းတော့ဘူး။
          ၀                 ၅
          ၄                 ၂
          ၁                 ၆
          ၃                 ၁
          ၆                 ၄
          ၂                 ၀
          ၅                 ၃
          (ယာယီတိုင်)   (နဂိုတိုင်)
          ပထမ ရွေ့တယ်၊ နောက် မရွေ့ဘူး။ အကယ်၍ ခင်ဗျားလာတဲ့ အချိန်က ယာယီနှစ်ထပ်ဆိုရင် စက်ဘီးပျောက်သွားပြီ။
          နဂိုနှစ်ထပ်ဆိုရင် အိမ်ကနေတောင် စက်ဘီးက နေရာမရွှေ့ဘူး။ နဂိုယာယီဆိုရင် ရှာရခက်မယ်။ ပြန်တွေ့ရင်တောင် ငွေကုန်မယ်။ ခု--- ခင်ဗျား စက်ဘီးပျောက်တဲ့အချိန်က ယာယီ၊ နဂိုဆိုတော့ စက်ဘီး ပြန်ရမယ်။ အင်္ဂါနံက တြိရန်းမှာ ရပ်တည်နေတော့ လှုပ်ရှားမှုတော့ရှိမယ်။ နဂိုတိုင်မှာ လှုပ်ရှားမှုရှိရင် ဈေး ထဲမှာရှိမယ်။ဒါပေမဲ့ နေရာရွေ့သွားပြီး။ ဈေးခေါင်းရုံး (ဒါမှမဟုတ်) ဈေးမိဈေးဖရုံးခန်းမှာ ကျွန်တော်တို့ သွားကြည့်ရလိမ့်မယ်။
          နှစ်ယောက်သား စကားတပြောပြောနှင့် ဈေးနားသို့ ရောက်လာကြသည်။ ဈေးတံခါးပ်ိတ်ထား သဖြင့် အထဲသို့ဝင်လို့မရ ဘေးဘီကို ကြည့်လိုက်ရာ ဈေးစောင့် ကိုထွန်းထွန်းအား သွားတွေ့သည်။
          ''ကိုထွန်းထွန်း --- ကိုထွန်းထွန်း''              
          ကျွန်ုပ်က ခပ်အုပ်အုပ်အသံဖြင့် လှမ်းခေါ်လိုက်ရာ -
          ''ဟာ -- ဆရာထွဋ် ၊ ညကြီးမိုးချုပ် ဘာလာလုပ်တာလဲ ၊ နောက်ကပါလာတာ ငံပြာရည်ဆိုင်က ကိုအောင်ဝင်းကြီး မဟုတ်လား''
          ''ဟုတ်တယ် ကိုထွန်းထွန်းရေ၊ ကိုအောင်ဝင်း တစ်ယောက် နေ့လယ်က ကျွန်တော့်ဆိုင်မှာ လက်ဖက်ရက်သောက်ရင်း စကားပြောနေတာ နည်းနည်းအချိန်ကြာသွားတယ်။ အဲဒါ အိမ်ပြန်တော့ စက်ဘီးကိုမေ့သွားတယ်လေ။ ခု---ညကြီးမိုးချုပ်မှ စက်ဘီးဈေးထဲမှာ ကျန်ခဲ့မှန်း သိတော့မယ်''
          ကိုထွန်းထွန်းသည် ကျွန်ုပ်စကားဆုံးသည်နှင့် တပည့်လေးအား ---
          ''ဟေ့ ------ မောင်လှအောင် ၊ ဈေးခေါင်းရုံးမှ သွားကြည့်စမ်း ကိုအောင်ဝင်း စက်ဘီးကျန်ခဲ့လို့တဲ့''
          ''ဟုတ်ကဲ့ ဆရာ''
          မောင်လှအောင်သည် ပြောပြောဆိုဆို ဈေးခေါင်းရုံးဘက်သို့ ပြေးထွက်သွားသည်။ (၅)မိနစ်လောက် ကြာမယ်ထင်ပါသည်။
          ''တွေ့တယ် ဆရာရေ ---- တွေ့တယ်၊ ညနေက ကိုထွဋ်တို့ လက်ဖက်ရည်ဆိုင်မှာ စက်ဘီး တစ်ဘီးကျန်ခဲ့တာတွေ့လို့ အဲဒီဆိုက် (SIDE) က ၀န်ထမ်းတွေ ဈေးခေါင်းရုံးကို ပို့ထားတာ''
          ကိုထွန်းထွန်းမှ ''စိတ်ချပါ ဆရာထွဋ် --- ကျွန်တော်တို့ ဈေးမှာ ကျန်ခဲ့လို့ကတော့ အပ်တိုတစ် ချောင်းမှ မပျောက်စေရဘူး။ ကဲ --- မောင်လှအောင်ရေ ဆရာထွဋ်တို့ စက်ဘီးကို ထုတ်ပေးလိုက်ပါကွာ''
          ''ဟုတ်ကဲ့ပါ ဆရာ''
          ကျွန်တော်နှင့် ကိုအောင်ဝင်း နှစ်ယောက်သား ဈေးခေါင်းရုံးမှ အဖွဲ့မှ ကျေးဇူးတင်စကားပြောပြီး ပြန်ထွက်လာချိန်တွင် ည(၁၀း၀၀)နာရီ။
          မိုးကတော့ နည်းနည်းစဲသွားပြီ။
          ''ကဲ --- ကိုအောင်ဝင်း ၊ ကျွန်တော် ပြန်မယ်။ ခင်ဗျားလည်း စက်ဘီးပြန်ရပြီဆိုတော့ စိတ်အေးရပြီပေါ့''
          ''နေဦးလေ ဆရာထွဋ်ရဲ့၊ လက်ဖက်ရည်သွားသောက်ရအောင်''
          ''ဟေ့လူ --- ခင်ဗျားတစ်ကိုယ်လုံး မိုးရေတွေရွှဲစိုနေတာ ထိုင်မနေနဲ့တော့။ မနက်ကျမှ တွေ့ကြ မယ်။ အချိန်ကိုလည်း ကြည့်လိုက်ဦး။ ည (၁၀း၀၀)နာရီ ကျော်နေပြီ''
          ''ဟဲ --- ဟဲ --- ဟုတ်သားဘဲ ၊ မေ့သွားလို့ပါ ဆရာရယ်''
          ''ခင်ဗျားကတော့ဗျာ ၊ တကယ်ပဲ မေ့နိုင်လွန်းတယ်။ တော်ကြာ အိမ်က မိန်းမကိုပါ မေ့သွားဦးမယ်''
          ''ဟဲ --- ဟဲ ---- ဒါကတော့ ဘယ်မေ့မလဲ ဆရာရယ်''
          ကိုအောင်ဝင်းသည် စပ်ဖြဲဖြဲနှင့် စက်ဘီးပေါ်တက်ကာ -
          ''သွားပြီး ဆရာရေ --- ကျေးဇူးပဲ''

          ကျွန်ုပ်သည် မိုးထဲရေထဲ စက်ဘီးကိုနင်း၍ ထွက်သွားသော ကိုအောင်ဝင်း၏ နောက်ကျောဘက် ကို မျက်စိတစ်ဆုံးလိုက်ကြည့်ရင်း ကျွန်ုပ်၏ လက်ဦးဆရာ ဦးသန်းဝင်း၏ အင်္ဂ၀ိဇ္ဇာတိုင်ပညာခန်းအား အကြိမ်ကြိမ် လေ့ကျင့်ပေးမှုကြောင့် '' ယခုကဲ့သို့ ဆုံးဖြတ်နိုင်သည်ကို စိတ်ထဲမှ တွေးပြီး ဆရာသခင် ကျေးဇူးရှင်တို့အား ပူဇော်ကန်တော့်လိုက်မိပါတော့သည်။


No comments:

Post a Comment