Friday, December 27, 2019

အယူတော်မင်္ဂလာပညာရပ်သို့
ချဉ်းကပ်ခြင်း
          အယူတော်မင်္ဂလာပညာရပ်ကို ကျွန်ုပ်လေ့လာခဲ့သည်မှာ နှစ်အတော်ကြာခဲ့ပြီ။ ၄င်းပညာရပ်နှင့် ပတ်သက်၍ ကျွန်ုပ်လေ့လာသိရှိသမျှအား တင်ပြရလျှင် အယူတော်မင်္ဂလာရဲ့ ဟောကွက်။ နည်းစနစ်တူ၍ သီးခြားမရှိပါ။ သို့သော်လည်း ထိုပညာရပ်ကို လေ့လာသူသည် ဗေဒင်ပညာရပ်တစ်ခုခု ကို အခြေခံတတ်မြောက်ထားရန်လိုအပ်ပါသည်။
          ရှေးကျမ်းများမှ အယူတော်မင်္ဂလာဦးနိုး၊ မင်းကံစီတို့၏ လျှောက်ထုံးများတွင် အချိန်နာရီ၊ နေ့ရက်များကို ဖော်ပြခြင်းမရှိဘဲ တိုက်ရိုက်စနစ်၊ သွယ်ဝိုက်စနစ်၊ အကြောင်းအကျိုးဆက်စပ်မှုတို့ကို ဦးစားပေးသုံးထားသည်ကို တွေ့ရှိရပါသည်။
          ဥပမာအနေနှင့် အယူတော်မင်္ဂလာ ဦးနိုး၏လျှောက်ထုံးတစ်ခုတွင် မောင်းထောင်ချိုင့်အုပ်ဆောင်း တွင် ဘယ်အရာရှိပါသနည်းဟု အမတ်မင်းတို့ မေးကြားသော မေးခွန်းအား လေ့လာကြည့်ရာ အုပ်တောင်းတွင်းမှ မမြင်ရသော အရာဝတ္ထုသည် သက်ရှိလား၊ သက်မဲ့လား၊ သက်ဂြိုလ်စိုးမိုးသလဲ အစ ရှိသော အကျိုးတရားဖြေရှင်းချက်တွင် လမ်း၌ ၀က်ကလေး(၂)ကောင်၊ မမြင်ရသောအမှောင် (၀က်မကြီး၏  ၀မ်းဗိုက်)တွင်းမှ ဖုံးကွယ်ခြင်းနှင့် ဖွင့်ဟလိုက်သော သဘောနှင့်မောင်းထောင်ချိုင့်တွင် ၀က်မဖြစ်နိုင်၊ ၀က်၏မျက်နှာနှင့် အလား သဏ္ဌာန်တူသော ကြွက်ဖြစ်ရမည်။ အရေအတွက်အားဖြင့် ၀က်မကြီးနှင့် ၀က်ကလေး(၂)ကောင်၊ ပေါင်း(၃)ကောင်ဖြစ်သောကြောင့် ကြွက် (၃)ကောင်ဖြစ်ကြောင်း လျှောက်ထားရာတွင် ကွက်တိမှန်ကြောင်း တွေ့ရှိရသည်။
          ဓါတ်မတူသော်လည်း သဏ္ဌာန်တူနှင့် သက်ရှိ၊ သက်မဲ့ခွဲခြား၍ ဟောကြားသွားသည်မှာ အံ့သြဖွယ် ကောင်းလှပါသည်။
          ၄င်းမေးခွန်းကိုလည်း မေးမည်ဟု ကြိုတင်သိရှိထားခြင်းမရှိဘဲ နေအိမ်မှ ထွက်လာကတည်းက ပြင်ပနိမိတ်များ ကြိုတင်ယူထားသည်ကို တွေ့ရသည်မှာ ချီးကျူးဖွယ်ရာကောင်းမှပါသည်။
          ကျွန်ုပ်တို့သည် ''အယူတော်မင်္ဂလာပညာအား လိုက်စားတော့မည်ဟု စိတ်ကူးထားမိလျှင် ၄င်းပညာရပ်၏ အခြေခံများကို သိရှိထားရန် လိုအပ်ပါသည်။ ကျွန်ုပ်လေ့လာမိသလောက် အယူတော်မင်္ဂလာ ပညာရပ်အား တင်ပြရလျှင် ----
          (၁)     အာရုံစူးစိုက်မှုထားခြင်း
          (၂)     စိတ်ကို တည်ငြိမ်သန့်ရှင်းအောင်ထားခြင်း
          (၃)     အချိန် ၊ နာရီ ၊ သတ်မှတ်ခြင်း
          (၄)     ပကတိသဘောနှင့် ၀ိကတိသဘောကိုကြည့်ခြင်း
          (၅)     ဓာတ်တူ ၊ နံတူကို ရှာဖွေခြင်း
          (၆)     အရပ်မျက်နှာကို ရွေးချယ်ခြင်း
          (၇)     အတိတ် ၊ ပစ္စုပ္ပန် ၊ အနာဂတ် နိမိတ်များကို ဆင်ခြင်ခြင်း
          (၈)     မျက်စိ နား အစရှိသော အာရုံ (၆)ပါးကို သတိကပ်ခြင်း
          (၉)     ကလေး ၊ အရူး ၊ သဘင်သည်တို့အား သတိပြုခြင်း အစရှိသော အခြေခံများကို
ဂရုစိုက်၍ လေ့လာရန် လိုအပ်ပါသည်။


(၁) အာရုံစူးစိုက်မှုထားခြင်း
          အာရုံစူးစိုက်မှုထားခြင်းဆိုသည်မှာ မိမိသိလိုသော သတင်း၊ အချက်အလက်နှင့် ပတ်သက်သော အကြောင်းကိုသာ အဓိကထားခြင်းဖြစ်၏။ ဥပမာ- ကျန်းမာရေးနှင့်ပတ်သက်၍ နိမိတ်ကောက်ရန် ဆန္ဒပြု ထားစဉ် အခြားအကြောင်းအရာများကို ခေါင်းထဲမထည့်ရန် ဖြစ်ပါသည်။

(၂) စိတ်ကိုတည်ငြိမ်သန့်ရှင်းအောင်ထားခြင်း
        အယူတော်မင်္ဂလာပညာရပ်ကို အသုံးချတော့မည်ဆိုပါက မိမိသိလိုသော သတင်းအချက်အလက် ကို ရှာဖွေနေစဉ် နေအိမ်မှ ပြဿနာများ၊ လူမှုရေးပြဿနာများနှင့် လောဘ၊ ဒေါသ ၊ မောဟ မာန အစ ရှိသော မသန့်ရှင်းသည့် စိတ်များ၊ တွေဝေစိတ်များကို မိမိစိတ်အတွင်းမှ မောင်းထုတ်ပစ်ရန် လိုအပ်နေ ပါသည်။

(၃) အချိန်နာရီသတ်မှတ်ခြင်း
        အယူတော်မင်္ဂလာပညာနှင့် နမိတ်ကောက်၍ ဆုံးဖြတ်ရန် ရည်ရွယ်ပြီးပါက မိမိသည် ဘယ်အချိန်မှ ဘယ်အချိန်အတွင်း ၄င်းမိမိသလိုသော သတင်းအချက်အလက်တို့အား ကောက်ယူမ ည်ဟု သန္နိဌာန်ချပြီးဖြစ်ရပါမည်။ သို့မဟုတ်ပါက တစ်နေကုန် ဇွန်းကျ၊ ခွက်ကျ၊ နှင့် အရာရာတို့မှာ နိမိတ်များဖြစ်ကုန်၍ ဆုံးဖြတ်ရန်ခက်ခဲတတ်ပါသည်။

(၄) ပကတိ နှင့် ၀ိကတိကို ကြည့်တတ်ခြင်း
        သဘာဝအလျှောက်ဖြစ်နေသောကြောင့် အရာများမှာ (ပကတိ) သဘောဖြစ်သောကြောင့် နိမိတ် ကောက်ရန် မလိုပါ။ (၀ိကတိ)သဘောဖြစ်သောကြောင့် နိမိတ်ကောက်ရန် မလိုပါ။ (၀ိကတိ)သဘော ကြောင့်ဖြစ်သော ထူးခြားဖြစ်စဉ်များကိုသာ ကောက်ယူရန်ဖြစ်ပါသည်။

(၅) ဓာတ်တူ ၊ နံတူကို ရှာဖွေခြင်း
        မိမိနိမိတ်ကောက်လိုသော အကြောင်းအရာနှင့် (ဓာတ်)သို့ (နံ) တစ်ခုခုတူညီမှုရှိမှသာ နိမိတ် ကောက်ရနလိုပါသည်။ အယူတော်မင်္ဂလာ ဦးနိုးသည် ယိုးဒယားနိုင်ငံစစ်ရေးကို နိမိတ်ကောက်ရန် ဆုံးဖြတ်ချက်ချ၍ ယိုးဒယားဈေးတွင် မိမိသိလိုသော သတင်းအချက်အလက်များကို ကောက်ယူ ခဲ့ကြောင်း သက်သေသာဓကများရှိခဲ့ဖူးပါသည်။

(၆) အရပ်မျက်နှာသို့ ရွေးချယ်ခြင်း
        သူ့ကို နိုင်လို ''ဆ'' ကိုခို ဟုဆိုသော ကျမ်းရင်းအလင်္ကာအရ မိမိနိမိတ်ကောက်မည့် နေ့၏(၆)ခု မြောက် အရပ်ကို ရွေးချယ်၍ နမိတ်ကောက်တွက်ရန်ဖြစ်ပါသည်။ (ဥပမာ) တနင်္ဂနွေနေ့ နိမိတ်ကောက်ရန် ရည်ရွယ်ခဲ့လျှင် အရှေ့မြောက်အရပ်သို့ ရွေးချယ်၍ နိမိတ်ကောက်ရန်ဖြစ်ပါသည်။

(၇) အတိတ် ၊ ပစ္စုပ္ပုန် ၊ အနာဂတ် နိမိတ်များကို ဆင်ခြင်ခြင်း
        အတိတ်ကာလ ဖြစ်ပျက်ခဲ့သောအကြောင်းတရားတို့ကို ဆင်ခြင်သုံးသပ်၍ ယခုမျက်မှောက် ကာလ အခြေအနေကို သုံးသပ်ကာ ဖြစ်ပေါ်လာမည့် သဘောတရားတို့ကို ဆင်ခြင်ရန်ဖြစ်ပါသည်။ (ဥပမာ)ဖားအော်သံကြားလျှင် မိုးရွာမည့်နိမိတ်ကိုပြခြင်း၊ ဌက်များ အသိုက်ပြောင်းလျှင် တောမီး(သို့) လေမုန်းကျမည့်သဘော၊ ပုရွက်ဆိတ်များ အသိုက်ပြောင်းလျှင် ရေကြီးမည့်သဘောအစရှိသည်တို့ ဖြစ်သည်။

(၈) မျက်စိ ၊ နား အစရှိသော အာရုံ (၆)ပါးကို သတိကပ်ခြင်း
        အယူတော်မင်္ဂလာပညာကို ဆုံးဖြတ်ချက်ချသည့်အချိန်တွင် မိမိ၏ မျက်စိနှင့် နားတို့၌ အထူး သတိကပ်ထားရန်လိုပါသည်။ လျှပ်တစ်ပြတ်မြင်တွေ့ရသော နိမိတ်နှင့်ထူးဆန်းသောအသံတို့မှာ နိမိတ် များဖြစ်တတ်၏ ။

(၉) ကလေး ၊ အရူး ၊ သဘင်သည်တို့အား သတိပြုခြင်း
        ကလေးများသည် လောဘ ၊ ဒေါသ ၊ မောဟ ကင်းစင်၍ ၄င်းတို့ပြောသော စကားတို့မှာ နိမိတ် များဖြစ်တတ်၏။ အရူးပြောသော စကားသည် လောဘဒေါသ မောဟမပါ၍ မှန်တတ်၏။ သဘင်သည် တို့၏ အပျော်အပြက်များသည်လည်း နိမိတ်များဖြစ်တတ်၏။ ယခုခေတ်တွင် မြေ၀ိုင်းသဘင်များ မရှိသည့်အတွက် တီဗွီမှလာသော အငြိမ့်သဘင်များကို နိမိတ်ကောက်လျှင်ရ၏။
          ကျွန်ုပ်ကိုယ်တွေ့အယူတော်မင်္ဂလာ ပညာခန်းတစ်ခုကို စာရှုသူဝါသနာရှင်များ ဗဟုသုတ ရရှိစေရန် (၂၀၁၅)ခုနှစ် (၁၁)လပိုင်း (၅)ရက်နေ့ ည (၉း၃၀)နာရီတွင် ကန်သွားသော ပရီးမီးယား ဘောလုံးပွဲစဉ် (၁၂)မှ ဘလက်ဘန်းနှင့် ချာတန်အသင်းတို့အား အယူတော်မင်္ဂလာနှင့် ဆုံးဖြတ်ခဲ့ပုံကို တင်ပြသွားပါဦးမည်။
          ထိုနေ့က ထူးထူးခြားခြား ရာသီဥတုက ခါတိုင်းနေ့ထက်ပိုအေးနေသည်။ ကျွန်ုပ်သည်လည်း ၄င်း ဘောလုံးပွဲစဉ်၏ အဖြေကိုသိရှိရန်အတွက် မျက်စိနှင့်နားကိုစွင့်ကာ အိမ်ရှေ့ပက်လက်ကုလားထိုင်တွင် ထိုင်နေစဉ် ကျွန်ုပ်၏သားတော်မောင် ဇော်မင်းထွဋ်သည် သူ့အမေအား
          ''အမေရေ ---- ဒီနေ့ မြ၀တီ ရုပ်မြင်သံကြားက ရုပ်ရှင်ကား အသစ်ပြမယ်တဲ့----''
          ဟုပြောဆိုကာ လက်ထဲတွင် သတင်းစာကို ကိုင်ထားသည်ကို တွေ့လိုက်ရ၏။
          ကျွနု်ပ်သည် ဘောလုံးပွဲစဉ် အရှုံး၊  အနိုင်ကို ဆုံးဖြတ်ရန် နိမိတ်ယူနေစဉ် ကလေး၏ အော်ဟစ် ပြောဆိုသံကို ဦးစွာ ကြားလိုက်ရ၍ စိတ်ဝင်စားသွား၏
          ထို့ကြောင့် -
          ''သားရေ ---- အဖေ့ကို သတင်းစာ ခဏကွာ''
          ဟုဆို၍ ကလေးလက်ထဲမှ သတင်းစာကိုယူ၍ ၄င်းအသစ်ပြမည့် ရုပ်ရှင်ကားအမည်ကို ကြည့်လိုက်ရာ ရုပ်ရှင်ကား၏အမည်မှာ -
          ''ကြယ်စင် ၀င်းပ ပန်းရိုးမ''
          ဟူ၍ တွေ့လိုက်ရ၏
          ကျွန်ုပ်၏ ဦးဏှောက်ထဲတွင် ထည့်ထားသော ဘောလုံးပွဲ အနိုင်၊အရှုံးနှင့် ၄င်းရုပ်ရှင်ကားအမည် ကို ဆက်စပ်ကြည့်လိုက်ရာ -
(၁)     ကြယ်စင် ၀င်းပ ဆိုသည်မှာ ကောင်းကင်တွင် ကြယ်များ လင်းလက် တောက်ပမှုကို ဆိုလိုကြောင်း သိလိုက်ရသည်။
(၂)     ပန်းရိုးမဆိုသည်မှာ ရိုးမတောင်တန်းတွင် ပန်းများဝေဆာကြောင်း ဖော်ပြခြင်းဖြစ်ပါသည်။
(၃)     နှစ်ခုလုံးကို ပေါင်း၍ ဆက်စပ်ကြည့်လိုက်လျှင် ရိုးမတောင်တစ်ခုလုံး အမှောင်ကင်းစင်၍ အလင်း
          သို့ရောက်မည့်သဘော၊ သို့မဟုတ် ရိုးမတောင်တန်းတွင် ဒုစရိုက်မှုများ ကင်းစင်ကာ ဖြူရောင်
          နယ်မြေ ဖြစ်သည့်သဘောကို ယူဆ၍ ရပါသည်။
          ကျွန်ုပ်သည် ----- ကျွန်ုပ်အာရုံပြုထားသော ဘောလုံးအသင်း အမည်နှစ်ခုတွင် ဘလက်ဘန်း ဆိုသော အသင်းသည် ပန်းရိုးမဟူသော အမည်နှင့်ဓာတ်တူ ၊ နံတူ ကိန်းတူ ဖြစ်ကြောင်း တွေ့လိုက်ရ၏။
          ဘ      လက်            ပန်း              ပန်း               ရိုး                 မ
          ၅        ၄                 ၅                 ၅                 ၄                 ၅
          နောက်ဆုံးအဖြေမှာ ''ကြယ်စင်ဝင်းပ ပန်းရိုးမ'' ဟူသော ခေါင်းစည်းစာတန်းနှင့် ''ကြယ်စင်ဝင်းပ ဘလက်ပန်း" ဟူသော သဘောသွားခြင်း တူညီသော အဓိပ္ပာယ်ကိုတွေ့လိုက်ရ၏။ ဘလက်ပန်း အသင်းမှာ ကြယ်စင်များ ၀င်းပသကဲ့သို့ ကောင်းကင်တွင် အောင်ပွဲခံမည်ဖြစ်ကြောင်း သိလိုက်ရ၏။
          တကယ့်အဖြစ်မှန်မှာ ဘလက်ပန်းအသင်းသည် ချာတန်အသင်းအား (၃)ဂိုး (၁)ဂိုးဖြင့် အနိုင်ရခဲ့၏။
          မြန်မာ့ရိုးရာ ဗေဒင်ပညာခန်းများထဲတွင် အယူတော်မင်္ဂလာပညာခန်း၏ ထူးဆန်းတိုက်ဆိုင်သော အဖြစ်အပျက်အချို့ကို ထပ်မံတင်ပြရလျှင်၊ ကျွန်ုပ်သည် ဗေဒင်ရုံးခန်းမှ အိမ်သို့ ပြန်လာစဉ် အိမ်ပေါ်  ရောက်ရောက်ခြင်း ကျွန်ုပ်၏ဇနီး၏ ဖခင်ဖြစ်သူ ဦးကျော်ဆွေမှ အိပ်ရာထက်မှ နေ၍ -
          ''သားရေ ----- ဒီမှာ ---- ၊ အဖေ့မိတ်ဆွေတစ်ယောက်ရဲ့ မွေးနေ့သက္ကရာဇ်ကို ယူလာတယ်----၊ သူ့ကို ဗေဒင်တွက်ပေးပါဦးကွာ----''
          ဟုပြောလိုက်ရာ ---- ကျွန်ုပ်မှာ အဖေ့မိတ်ဆွေရဲ့ မွေးနေ့သက္ကရာဇ်ကို ကြည့်စရာမလိုကြောင်း၊ အဖေသည် အိပ်ရာထက်မှ ဗေဒင်မေးသောကြောင့် အဖေ့မိတ်ဆွေသည် ကျန်းမာရေးမကောင်းကြောင်း၊ ယတြာလုပ်ရန်အချိန်မမီကြောင်း၊ အယူတော်မင်္ဂလာနှင့် ဆုံးဖြတ်ခဲ့ရာ နောက်ရက်တွင် အဖေ့မိတ်ဆွေ သည် သင်္ဃန်းကျွန်း စံပြဆေးရုံကြီးတွင် ဆုံးသွားကြောင်းသိလိုက်ရ၏။
          နောက်ထပ်အဖြစ်အပျက်တစ်ခုမှာ --- ကျွန်ုပ်သည် တစ်ခုသော နံနက်ခင်းတွင် ဗေဒင်ရုံးခန်းသို့ မသွားမီ ရေချိုးရန် ရေခွက်နှင့်ဆပ်ပြာခွက်ကို ကိုင်ကာ ရေစည်ပိုင်းဆီသို့ အသွားတစ်ဖက်အိမ်မှ ဇနီး ဖြစ်သူ၏ ညီမတော်သူ မခင်စန်းဝင်းသည် သူ၏ကျန်းမာရေးနှင့်ပတ်သက်၍ ဗေဒင်မေးလာရာ ကျွန်ုပ် သည် ဗေဒင်တွက်စရာမလိုကြောင်း၊ ကျွန်ုပ်ရေချိုးရန်ပြင်နေစဉ် ကျန်းမာရေးကိစ္စပေးသောကြောင့် အယူ တော်မင်္ဂလာပညာအရ ရက်ပိုင်းအတွင်းနေကောင်း၍ ရေပင်ချိုးနိုင်ကြောင်း ပြောပြရာ နောက်ရက်တွင် တာရှည်နေသော အများမှာ ရုတ်တရက်ကျ၍ ရေပင်ချိုးနိုင်ကြောင်း သိခဲ့ရသည်။
          အလားတူ ကျန်းမာရေး ပြဿနာတစ်ခုကို တင်ပြရသော် ကျွန်ုပ်၏ သမီးဖြစ်သူ မဇင်မာစိုးထွဋ်သည် နားရောဂါဖြစ်သဖြင့် ဆေးခန်းပေါင်း မြောက်မြားစွာပြခဲ့ရ၏။ အထူးကုနှင့်ပြသော် လည်း မသက်သာ။ ကျွန်ုပ်သည် ၄င်း၏ ကျန်းမာရေးကိစ္စကို အယူတော်မင်္ဂလာပညာနှင့် ဆုံးဖြတ်ရန် လမ်းထိပ်ကွမ်းယာဆိုင်သို့ ရောက်ခါနီးတွင် ကွမ်းရောင်းသော လူငယ်မှ -
          ''ဟေ့ --- ဒီမှာ ၊ ရွှေမန်းကွမ်းယာဆိုင်က ဆေးပေါင်း သံပရာ အရမ်းကောင်းတယ် ----''
          ဟုအော်ဟစ်ပြောဆိုသံကို ကြားခဲ့သဖြင့် ဗမာဆေးရောင်းသောဆိုင်းမှ ရွှေမန်းတောင်သွေးဆေး ကို ၀ယ်ကာ သံပုရာနှင့် ဖျော်တိုက်ခဲ့သဖြင့် သမီး၏နားအူရောဂါပျောက်ကင်းကြောင်း ကိုယ်တွေ့ကြုံ တွေ့ခဲ့ရ၏။
          ကျွန်ုပ်သည် -
          မျက်မှောက်ခေတ်ကာလတွင် အယူတော်မင်္ဂလာပညာရပ်မှာ တိမ်မြှပ်စပြုနေပြီး၊ မလိုလားအပ် သော သာမန်ကိစ္စများကိုသာ သုံးစွဲနေကြောင်း တွေ့ရှိရပါသည်။
          ကျွန်ုပ်ကြုံတွေ့ခဲ့ရသောအယူတော်မင်္ဂလာပညာနှင့် ပတ်သက်သော အကြောင်းခြင်းရာများမှာ သေရေး၊ ရှင်ရေးကိစ္စနှင့် အမှန်တကယ်လိုအပ်၍ သုံးစွဲခဲ့သည်ကများပါသည်။ စာရှုသူ ၀ါသနာရှင် အပေါင်းတို့သည်လည်း မြန်မာ့ရိုးရာ ဗေဒင်ပညာရပ်ထဲမှ အယူတော်မင်္ဂလာပညာရပ်အား သုံးစွဲတော့ မည်ဟုဆိုပါက တကယ့်ကိုယ်ရေးကိစ္စများ၊ အရေးကြီးကိစ္စများကိုသာ သုံးစွဲရန်နှင့် သာမန်မလိုအပ်သော ကိစ္စတွင် ၄င်းပညာရပ်များကို အသုံးမပြုရန်နှင့် (အပေါ့စား၊ အပေါစား)ပညာရပ်ဟု စိတ်ထဲတွင် မထင်မှတ်စေလိုကြောင်း စေတနာထား၍ တိုက်တွန်းလိုက်ရပါသည်။




No comments:

Post a Comment